Kooperatibismo feminista lantzen hasi ginenean, sentitzen genuen Gipuzkoan kooperatibismo feminista olatu bat zegoela, baina itsaso zabalean olatu guzti horiek ezin topatu zebiltzala. Pultsio horri kasu eginez, ekin genion gaia lantzeari eta, besteak beste, topaketa batzuk antolatu genituen kooperatibismo feministaren olatu honek zituen erronkak denen artean identifikatzeko.
Handik abiatuta, ikerketa bat egin genuen eta adostu genuen garrantzitsua zela kooperatibismo feminista tresna konkretuz elikatzea. Hots, kooperatibismoak eskaintzen dizkigun tresnetan balore eta ikuspegi feministak formalizatzeko erronkari heltzea.
Kooperatibismoaren oinarrizko tresnetako bat Barne Araudia da, kooperatibaren eguneroko bizimodua arautzen duelako. Hori dela eta, Barne Araudi horretan ikuspegi feminista txertatzen laguntzeko gida bat osatu du Farapik.
Barne Araudi Feministarako Gida inguruko proiektu kooperatibo feminista askoren eskuzabaltasunari esker osatu da. Kooperatiba hauen esperientzia eta praktika errealetan oinarrituta osatu da. Beraz, eskertza berezi bat eman nahi diegu proiektu honetan bidelagun izan ditugun kooperatiba guztiei. Kooperatiba hauen praktikak eta hausnarketak modu ezberdinetan ezagutu ditugu, kasu batzuetan aurreko ikerketan erantzun zuten galdetegiaren bitartez, beste batzuk beraien barne araudiak aztertzeko eskaini dizkigutelako eta besteak elkarrizketatu ditugulako.
Gida hau egiteko, Almena kooperatiba feministak egindako lana izan dugu oinarri eta inspirazio iturri. 2021an, Kataluniako kooperatibentzako Eina per elaborar reglaments de règim intern amb perspectiva feminista, tresna sortu zuten, eta bertan egin zuten lana Gipuzkoako errealitatera ekarri dugu.
Bideo honetan ezagutu dezakezu zertan datzan ‘Kooperatibetan Barne Araudi Feminista osatzeko gida’:
Kooperatibetan Barne Araudi Feminista osatzeko gida
Kooperatibismoak eskaintzen dizkigun tresnetan balore eta ikuspegi feministak formalizatzeko erronkari heltzen dio gida honek. Kooperatibismoak bere dituen tresna horien artean aurkitzen da Barne Araudia, kooperatibaren eguneroko bizimodua arautzen duena.
‘Kooperatibetan Barne Araudi Feminista osatzeko gida’, inguruko proiektu kooperatibo feminista askoren eskuzabaltasunari esker osatu da, haien esperientzia eta praktika errealetan oinarrituta.